Bi Evdila Dirêj re hevpeyvîn

Gelo wê dilopa sêyem jî biherike gola ferhenga kurdî?

Soz nadim. Xebatên li ser ziman zor in, dijwariyên xwe hene. Xwesma yên dersê; divê bêqusûr bin, di pîleya tineyiyê da kêmasiyên wê hebin. Heke xebatên wiha xweser bin; yanê bi ser ti sazî û dezgehê va nebin, ev zor û zehmetî xwe dikin du qat. Ji ber vê yekê jî nikarim bêjim wê dilopa sêyem jî binûqute.

Plan û amadehiya xebatên din hene?

Ez yeqîn nakim ku meriv rêwiyê rêya zimanê kurdî be, bê plan û amadeyî be. Nenivîse û serê xwe neêşîne. Min jî biqasê bîr û zanayiya xwe hin reşbelek hene.

Hinan jî min niyet heye dest pê bikim. Vêca li gorî derfet, teqet û kalîteyê û hinek jî bi destûra hêzên jorîn ez dê wan ragihînim ji bo we. 

Armanca Te pêk hat/Ev xebat bi dilê Te ye?

Di ti xebat û berhemdanê da armanc ji sedîsed pêk nayê. Di yên min da jî ev yek bi têra xwe derbasbar e. Mîna ku tu jî dizanî rêbazên hînkirina ziman, hema bêje standart bûne li cîhanê. Li gorî van standardan sê pêngav hene: Pêngava yekem, ji bo destpêkê; A1/A2, pêngava duyem, ji bo pêşketî B1/B2 û pêngava navîn in. Kesên biyaniyên wî zimanî heke van her sê pêngavan derbas bike, hingî dikare bi wî zimanî bipeyive, binivîse û pê xwe vêbêje.

Başî û xirabî, di derbarê pirtûkê de tu yê çi bêjî?

Pêşî ez ji nebaşiyan dest pê bikim. Dibe ku hin biraderên ku bi ziman mijûl in nerihet bin ji vê gotina min lê ez dibêjim ku zimanê me di warê rastnivîsê da hîn standart nebûye. Ji vî îşê ra perwerde û dewlet divê. Niha ne ciyê wê ye. Naxwezim bikevim nava kitekitan, lêbelê ev nestandartbûn gelekî bêhna min teng kir. Di hilbijartina peyivan da gelek car dudil mam. Mîna gelo ev peyiv rast e, yan a din? Heta ji destê min hat, min zimanê pirtûkê standart kir. Belkî jî ji nezaniya min be, bixwezî û nexwezî hin peyiv ji hev cûda hatin nivîsandin û ne li gorî dilê min bûn. Di peydakirina wêne û kişandina fotografan da jî min êpêy zehmetî kişandin. Min xwest wêne û fotoyên pirtûkê ji welêt werin. Min ji çend Xwîşk û birayan tikaya çend wêne û fotoyan kir, spas ji bilî yek û duyan kesek bersivek erênî neda vê daxwaza min. Dîsa ciyê spasê ye ku bêjim; ne ji alîkariya hevalê min Recep Maraşli ba, dê wêneyên pirtûkan nîvçe bimana.

Yekûyek sipas ji wan hevalên ku bi hewes û ji dil dengên xwe dan CDya guhdarîkirinê, ku ne ji wan ba ev xebat dê seqet bimaya.

Helbet başî û dilxweşiyên vê xebatê jî pir in. Ez vana dihêlim li hêviya xwendekaran. Gel û miletê me ku bi vê xebatê kêfxweş be û van berheman bipesinîne, ez ê jî pê serbilind bim û ev besê min e.  

Lêbelê min maf heye van kêfxwşiyên xwe jî bêjim li dawiyê. Ne wisa?

Nûjeniya rêbazên hînkirinê yên pirtûkê, foto û wêneyên rengîn, bi hînkirina zimên ra hînkirina hin edet û toreyên kurdî, qisimek danasîna ji wêjeya kurdî, bi rêya muzîk hînkirina ziman hêjayê gotinê ne.

Û ji zimanekî mîna zimanê kurdî bê perwerde, bê dewlet û destek, di bin evqas asîmîlasyon û mendeleyê da xebatên wiha derketibin û ev pirtûkine di refên pirtûkxaneyên almanî da, di nava zimanên cîhanê da, ne ji kalîteyên wan kêmtir ciyên xwe girtibin, ev ji niha da ciyê şanaziyê ye ji bo min.

Kî ye Evdila Dirêj?